Tripp tripp, trapp trapp
Tripp tripp, trapp trapp
En Älsdörp joh do es en Click, die nennt sich Brooderschaff,
die lööf zickt üvver 20 Johre ze Fooß noh Trier eraff.
Anfang September jedes Johr do jeht dat Spellche loß
do hält die nix mieh, app jeht et zu Fooß üvver de Stroß.
Bis Etzwieler dann en de Bösch, do weet sich ets begröß.
Von he aff sin mer all per Du, doch Wallfahtshännsje röf:
„För osser Pastur sare mer Sie“, dat es doch einfach klor,
drop senge all die Mattheiswallfahrtsbröder wie em Chor:
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
En Mäzenisch am Fußballplatz, do es de eetste Paus.
Noh loffe, schweije, bedde, jitt et do ne Kaffeschmaus.
Et jitt belääte Brütsche un och haddjekochte Eier,
zick 20 Johr uss Tradition von Bäcker Lambert Beyer.
Üvver Binsfeld lovve mir dann noh Jut Stepprath durch et Feld.
Bis Drove üvver de Panzerstrooß dat es och net de Welt.
Denn he es dann der Meddachsdesch vom Troß parat jemaat,
die Mattheiswallfahrtsbröder senge dorömm janz apart.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Von Drove üvver Thum un Berch jeht et am Nommendach,
lans Forsthaus Bade, Walbich dann bis Herjarten eraff.
He es am etste Daach et Ziel wofür mer dankbar sin,
un en der Jasshoff Lafreysen, jonn mir janz jän eren.
He weet et etste Bit jezapp, dat schmeck su janit fieß,
als wenn ene kleine Engel uns hätt op de Zong jepiss.
Un noh dem jode Ovendesse sin mir widder klor.
Von wiggem hööt mer sengen dann der Wallfahtsbröderchor
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Dä zweiten Dach fänk morjens ald met Bedde düschtich ahn,
bis Düttling met enem Russekranz dat mir kein Luff mih han
Jeht et dä lange Berech eropp donoh es Schweijemarsch
un koot für Voißel sen mer dann fass wie sujoot kapott.
He weet dann evver Jottseidank en hillije Mess gefeht
Donoh bis Kall weed widder ene Russekranz jebett.
Noh Sötenisch, am Hermannjosefbrunnen weet jedööf
die Erspiljer und alle Wallfahrtsbröder sengen söös:
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Et Esse krieje mir en Steinfelderheistert dann servet.
He weet jemütlich jot ein Stund en ener Schür kampeet.
Domet dat Dahmens Addi sich kann läjen op sing Matt.
Söns wör de hinger Krekel villeich schon e bitsje platt.
Noh Paulushof do jitt et Kaffee un et weet jekallt.
Wat deit mer un su wie et es wen mer Probleme hatt.
Dann durch der Bösch bis Schmidtheim und noh Dahlem üvver de Binz.
Haus Feuerstein läd ein un Mattheisbröder sengen ens.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Noh einem schöne Ovend met vill Bitt und jodem Esse.
Fahre mir am nächste Morje met demm Trecker wirklich besser.
Bis Wirftal henger Stadtkyll, do weet för de Näht jedank.
Su manch einer es vun demm Ovend fürher noch jet krank.
Em Steffeler Bösch do weet die schönste Mess der Tour gefiert,
wenn do de Sonn dann durch die Bäum ne richtije Dom kreiert.
Pastur dä mät dat he em Bösch et Sonndachs richtisch fein
Un alle die Mattheiswallfahtsbröder stimmen fröhlich ein:
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Durch Steffeln, Duppach jeht et bis no Büdesheim üvver de Strooß.
En Duppach krieje mir meistens von der Feuerwehr ene Jrooß.
Die spille he dat Spellche durch, wie lösche mir ene Brand.
Un jitschen met de Schläuch jet durch de Jäjend allerhand.
Es Büdesheim erreich, dann weet et widder richtisch fein.
Zum Meddachesse kehre mir en ene dolle Kohstall ein.
He hätt dat Wallfahtshänsje leckere Bunnezupp jekoch.
Noh Büdesheim der Berech eropp, sink löstisch dat Jeloch:
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Wenn mir de Piljerstroß erreich han sin mer richtich hei.
Met Russekränz und löstije Leedcher jeht et eins, zwei drei.
Durch Weißenseifen bis nohm Krüz von Neuwerk allerbess
Noh Kaffe, Koche senge mer he de Vesper jot jerääß.
Dann Neidenbach, Neuheilenbach un widder en der Bösch
Vorbei am Eisenmännchen un durch Moorweiler jewösch.
Nur noch e janz klein Stöckche un der steile Berech eraff.
Kyllburch es nun erreich und alle Pilger laufen aff.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Am vierte Dach do mache mir dann osser Meisterstöck;
Noh Wilsecker der Berech eropp, do meints do wütz verröck.
Met enem Russekranzjebett bis dat do baal kein Luff mi kriis,
so mancher hätt ald do erop jemeint hä bliev em Ress.
Em Wilsecker Kirchelche zum Heiligen Eligius
Raue mir uns dann jot von dem steile Jang e bitsje us.
Un trotzdem sin mer all dobei wenn mir de Mess he fiere,
denn alle Mattheiswallfahtsbröder dun he jubiliere.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Donoh jeht et janz flöck bis hin noh Erdorf ahn de Bahn.
Bis Daufenbach do kütt et os op en Bahnfahrt janit ahn.
Dann wigger bis noh Kordel lans de Kyll em Rubbedidupp.
Un do em Musikpavvillion, do krieje mer Jullaschzupp.
Dovun jestärck jonn mir dat letze Stöck noh Trier hin ahn.
Un freue uns wenn mir kumme ahn os Broderschaffkrütz eran.
He hale mir en Ahndach för all die en Älsdörp sin,
dropp stemme all die Mattheiswallfahtsbröder kräftich en.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Von do us wet dann durch de Bösch nom Eifelkreuz jeschlänz.
Dann bis zur Eschermüll wo noch ens Kaffe wet kredenz.
Un dann dä furchtbar steile Wäch zur Autobahnbröck eropp,
wo mer dann fass schon meine künnt manch einer wör jedopp.
Am Schusterkreuz do schnappe mer noch enz janz deef richtich Luff,
befür et jeht der Berech eraff bis ahn die Moselfluch.
Dann litt et os zo Föösse, osser Ziel met singer Prach,
Un all die Wallfahrtspiljerbröder senge dat et krach.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Et schönste evver es dat letzte Stöck he vun der Tour
wenn mir am Moselufer jonn jetrocke wie en Schnur
dann üver de Bröck un Mattheis litt vör uns met singer Prach
de Jlocke lügge und os Piljehäz es voller Lach.
Met „Jroßer Jott wir loben dich“, su trecke mir do en.
Der janze Liev der fiberiert, so muß dat jo och sen.
Su Manchem lööf e Trönche lenks und rächs de Back eraff.
Doch jlöcklich sin mer all, dat mir der Wäch widder jeschaff.
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Dat Märche von dä fremde Fraulück un demm bessere Bier,
woröm mir laufe Johr för Johr no Mattheis hin en Trier.
Es quatsch, dat weiß doch jedes Kenk, mer donnt dat för uns Siel.
Wä vill läuf muß och drenke vill, dat es et janze Spell.
Denn wenn dir ens der Rähn von führe en et Jesech eren schläch,
Dann weeß de ets wat piljere zu Fooß noh Trier hin hech.
Met decke Fööß un wiehe Been kütt mancher dohin ahn
Zum Dank fänk do der jantze Piljerchor ze senge ahn:
Tripp Tripp, Trapp Trapp, Tripp Tripp, Trapp Trapp
Zick üvver 20 Johr, do laufen mir noh Trier eraff.
Melodie: Radeberger-Buurebürger-Spillverein
Text: Richard Sachse (1999)