Wenn m’r  emol noh Trier es hinjejange

noh Sank Mättes durch de Eifel und zoröck.

Jeden Morje öm halev sechs weed opjedtange

un die Bloose, die petschen wie verröck.

Schlangs Hans Willi, dä deit dich dann verazte,

all die Peng verflüch dobei su wie em Floch.

Stundelan kann’s do dich op dem Wäch vermache,

kriss vom Laufe durch de Jäjend net jenoch!

Jo no Trier muss de jon,

für Sank Mättes muß de stonn,

dann wees de ets watt piljere bedöck!

Decke Fööss , wiehe Been, un e paar Blose ovendren,

die verjiss de do för lauter Wallfahrtsjlöck!

Wenn der Broodermeister fleut dann hees et sammele,

för ze bedde, schweije oder för e Leed.

Denn dat Bedde för uns selevs un för die andere,

es der Zweck woröm mer op der Wäch sich määt.

Jecke Tön un och vill Wetz donn mir verzälle,

dat der Wäch uns och ets janit weet zelang.

Bedde, lache, schweije, Kircheleedcher senge,

doför mache mir uns all he janit bang.

Och Pastur jeht met uns, doför sen mir dankbar,

jeden Morje liss dä för uns all de Mess.

Su sorsch hä för unser Seelenheil met Andach;

ovends litt hä dann als eetster en de Kess.

För et Esse sorje Elmar, Hans un Lambäät

Un der Träcker dä Fährt Aloys wie doll.

Ovends Bitt dann morjens fit es watt uns och nährt,

denn vom Piljere krieje mir de Nas net voll!

Wenn do ahnküss meinste do läufs wie op Wolcke

un dat Hätz dat schläht op eimol flöck vüran.

Schon von wiggem hört mer vun Mattheis de Jlocke,

Broder Hubbät waat em Hoff ald zum Empfang.

„Jroßer Jott mir loben dich“ sink m’r beim Einmarsch

un die Aure sen met Troone jlöcklich voll.

Bei Sank Mättes kneen’s de hin, danks för dä Hinmarsch.

Betts dat alles joot un richtisch wääde sull.

Dröm ihr Fraue dat eine lost üch sare,

lost ühr Männer ruhisch allein noh Trier hin jonn.

Stress un all ihr Sore donn se met hindrare

Noher künnt ehr öm su besser se verstonn.

Noh nüng Dach, wenn se dann widder janz zeheem sin,

bei ehr Kinger un bei ehrer leeve Frau

sen wie ömjewandelt vun dem Jank noh Trier hin,

bis zom nächste Johr do jeven se dann Rouh!

Melodie: Willi Ostermann (Neh ich mach dich net mieh...)

Text: Richard Sachse 1994